အထက်ပါခေတ်သစ်မြန်မာများကိုယ်တိုင် ပထမဦးဆုံးထုတ်ဝေသော သည်ဘားမင်း သတင်းစာမှာ ကြာရှည်စွာမတည်တံ့ပဲ တစ်နှစ်ခန့်လောက်နှင့် ရပ်တန့်သွားရာ ဦးလှဖေသည် ဦးဘဖေနှင့်တွဲကာ ၁၉၁၁ ခုနှစ်တွင် သူရိယသတင်းစာ ကို တည်ထောင်ထုတ်ဝေလေသည်။ သူရိယသတင်းစာမှာ အင်္ဂလိပ်စာတတ် ခေတ်မီလူသစ်များ ကြီးကြပ်အုပ်ချုပ်လျက် ဆရာတော် ဦးဥတ္တမ၊ သခင်ကိုယ်တော်မှိုင်း၊ ဆရာကြီးဦးပွား၊ ဦးပြုံးချို၊ မှော်ဘီဆရာသိန်းကြီး၊ ရွှေဥဒေါင်း စသော ပုဂ္ဂိုလ်ကြီးများ ပါဝင်ရေးသားကြသောကြောင့် သတင်းစာတစ်ခေတ် ပြောင်းလဲစေသော ရှေ့ဆောင်သတင်းစာကြီးဖြစ်လာလေသည်။
၁၉၁၄ ခုနှစ်၊ ပထမကမ္ဘာစစ်ကြီး ဖြစ်ပွားလာသည်တွင် စစ်ကြီးအကြောင်း နောက်ဆုံးသတင်းများကို ဖတ်လိုသော မြန်မာပရိတ်သတ်များအတွက် ဦးရွှေကြူးက စစ်ကြေးနန်းသတင်းကို ထုတ်ဝေလေသည်။ ၄င်း သတင်းစာမှာ စစ်သတင်းများသာ မဟုတ်၊ တိုက်ပွဲဓာတ်ပုံများကို ဘလောက်ပြုလုပ်ထည့်သွင်းဖော်ပြသဖြင့် မြန်မာသတင်းစာများအနက် ဓာတ်ပုံ၊ ရုပ်ပုံပါသော ပထမသတင်းစာဖြစ်လေသည်။ ၁၉၁၇ ခုနှစ် လောက်တွင် ဦးရွှေကြူး စင်္ကာပူသို့ရောက်သွားသည်တွင် ရပ်စဲသွားသည်။
ဝံသာနုခေတ်သတင်းစာများ
ထို့နောက် ၁၉၁၇ ခုနှစ်၊ အိန္ဒိယနိုင်ငံတော်ဆိုင်ရာ ၀န်ကြီးမွန်တေဂူနှင့် အိန္ဒယဘုရင်ခံချုပ် လော့ဒ်-ချမ်းစဖို့ တို့၏ ပြုပြင်ပြောင်းလဲရေးကြေညာချက်နှင့်ပတ်သက်၍ မြန်မာတို့က ကိုယ်ပိုင်အုပ်ချုပ်ရေး (ဟုမ္မရူး) တောင်းသည်တွင် ၀ံသာနုခေတ်ကြီး ပေါ်လာလေသည်။ ထိုအချိန်လောက်တွင်ပင် ပညာ့အလင်းသတင်းစာ၊ မြန်မာ့အလင်းသတင်းစာ၊ မြန်မာပြည်စောင့်သတင်းစာများ ပေါ်လာကြသည်။ ထို့နောက် ၁၉၂၀ ကျော်တွင် လစ်ဘာတီ၊ ဒီးဒုတ်၊ ဗန္ဓုလ၊ ဇေယျ၊ သစ္စာဝါဒီ၊ အောင်မြန်မာ၊ ၀ံသာနု၊ တိုင်း ချစ်မြန်မာ၊ ဘားမားအော့ ဗဆားဘား၊ နယူးဘားမား စသောသတင်းစာများ ပေါ်လာ၍ အင်္ဂလိပ်အစိုးရ အုပ်ချုပ်ပုံပေါ်လာ၍ အင်္ဂလိပ်အစိုးရအုပ်ချုပ်ပုံစသည်များကို ပြင်းပြင်းထန်ထန်ဝေဖန် ရေးသား၍ ၀ံသာနု မျိုးချစ်စိတ်ဓာတ်ကို အမြင့်ဆုံးရောက်အောင် နှိုးဆော်ပေးကြလေသည်။ အင်္ဂလိပ်အစိုးရကလည်း နည်းအ မျိုးမျိုးဖြင့် ဖိနှိပ်ချုပ်ချယ်၍ အယ်ဒီတာများမှာ ထောင်တဖုတ်ဖုတ် ကျကြလေသည်။ ထိုသို့ဖိနှိပ်ချုပ်ချယ်မှု အောက်တွင် ရုန်းကန်ကြရာတွင် သတင်းစာလုပ်ငန်းမှာ သတင်းယူပုံ၊ ရေးနည်းရေးပုံ၊ အထားအသို၊ အယူ အဆမှစ၍ တစ်နှစ်ထက်တစ်နှစ် စနစ်ကျ၍ အဆင့်အတန်း တိုးတက်လာလေသည်။
စစ်တွင်းဂျပန်ခေတ်သတင်းစာ
၁၉၄၂ ခုနှစ် ဂျပန်စစ်တပ် မြန်မာပြည်သို့ တိုက်ခိုက်ဝင်လာ၍ စစ်တပ်အုပ်ချုပ်ရေး လက်အောက်သို့ ရောက်သောအခါ သတင်းစာ လွတ်လပ်ခွင့်မရသည့်ပြင် စက္ကူရှားပါးမှုဒဏ်ကြောင့် သူရိယသတင်းစာ မြန်မာ့အလင်းသတင်းစာ မြန်မာအစိုးရက ထုတ်သော ဗမာ့ခေတ်၊ ဂျပန်စစ်တပ်က အင်္ဂလိပ်ဘာသာဖြင့် ထုတ်သော ဂရိတ်တား-အေရှသတင်းစာတို့သာ ထွက်ပေါ်တော့သည်။
စစ်ပြီးခေတ်
၁၉၄၅ ခုနှစ်၊ ဂျပန်လက်နက်ချ အရှုံးပေး၍ အင်္ဂလိပ်များပြန်လည်ဝင်ရောက်လာသောအခါ စစ်မဖြစ်မီက သတင်းစာများဖြစ်သော သူရိယ၊ မြန်မာ့အလင်း၊ စစ်တွင်းက ဖြစ်သော ဗမာ့ခေတ်၊ နောက်ထပ်ပေါ်ထွက် လာသော ခေတ်သစ်၊ မြန်မာ့တက်လမ်း၊ လမ်းညွှန်၊ လွတ်လပ်ရေး၊ ဟံသာဝတီ၊ ဗမာ့စီးပွား၊ သံတော်ဆင့်၊ ပြည်သူ့အသံ၊ ဗမာ့ရှေ့ဆောင်၊ မန္တလေးသူရိယ၊ ဇွဲနေ့စဉ်၊ မြို့မမောင်သတင်းစာ၊ မျိုးစောင့်၊ ဒေါင်းတောင်၊ တိုင်းလုံး၊ သမာဓိ၊ ဖဆပလသတင်းစဉ်၊ ရန်ကုန်နေ့စဉ်စသော မြန်မာသတင်းစာသစ်များနှင့် ရန်ကုန် လိုက်ဘရေတာ၊ နယူးတိုင်းအော့ဘားမား၊ ကွန်မင်တေးတား၊ ဘီစီနက်မင်း၊ သည်-ဘားမင်း၊ မောနင်းစတား၊ ဗွိုက်စအော့-ဘားမားစသော အင်္ဂလိပ်ဘာသာ သတင်းစာသစ်များ ထွက်ပေါ်လာကြ လေသည်။ စစ်ပြီးစသတင်းစာစက္ကူအခက်အခဲကြောင့် တစ်နေ့လျှင် ၂ မျက်နှာ၊ ၄ မျက်နှာစီသာ ထုတ်နိုင် ကြသည်။ ၄င်းတို့အားလုံးပင် လွတ်လပ်ရေးတိုက်ပွဲဝင်များအဖြစ် အထူးမှတ်သားထိုက်ပေသည်။ ၁၉၄၈ ခုနှစ် လွတ်လပ်ရေးရပြီးသည့်နောက်မူကား ၄င်းသတင်းစာများအနက် အနည်းငယ်သာ ကျန်ရှိ၍ အများမှာ ပျောက်ကွယ်သွားကြလေသည်။
ဤတွင်ကား ၁၉၄၈ ခုနှစ် လွတ်လပ်ရေးရသည်အထိ မြန်မာသတင်းစာ သမိုင်းအကျဉ်းချုပ်ဖြစ်ပါသည်။
ဇေယျ
No comments:
Post a Comment