စဉ်းစားမိတာလေးတွေ

လူဆိုတာကလဲ ခက်တော့ခက်သားလားဗျာ။ အလုပ်မရှိလို့ အားနေရင် စိတ်ထဲမှာ ဟိုအတွေးပေါ်လာလိုက်၊ ဒီအတွေးပေါ်လာလိုက် နဲ့ တော်တော်နဲ့ဖျောက်မရဘူး။ ဒီနေ့လဲ အားတယ်ရယ်လို့တော့မဟုတ်ဘူးပေါ့ဗျာ။ ခေါင်းထဲမှာ စဉ်းစားစရာနဲ့ မှတ်သားစရာ ပေါ်လာတယ်။ ဟိုနေ့က ဆရာချစ်ဦးညို ရဲ့ စာပေဟောပြောပွဲ အသံဖိုင်လေးကို တွေ့လို့ ပြန်နားထောင်မိတယ်ဗျ၊ ဒေါင်း ထားတာကြာပါပြီ၊ နားမထောင်ရ သေးသလို ရှိတာနဲ့ နားထောင်လိုက်မိတယ်၊ ပြဿနာက အဲဒီမှာစတွေ့တာပဲ၊ တော်တော်လေးကို နားထောင်လို့ကောင်းတယ်၊ အဲဒီအထဲမှာ ဆရာချစ်ဦးညိုက ပြောတယ်၊ မင်းတုန်းမင်းလက်ထက်တုန်းက အင်မတန်တော်၊ အင်မတန်ထက်တဲ့ ပခန်းဝန်ကြီး ဦးရန်ဝေးဆိုတာရှိတယ်။ သူက အလုပ်မှာ မခိုမကပ် တိုင်းပြည်အတွက်ဆိုရင် ဘုရင်ကိုယ်တောင် ပြန်ပြောဝံ့တဲ့ သတ္တိ ရှိတယ်ဆို့ပဲ.။ တစ်နေ့တော့ ဘုရင်တော်တော်လေးကို စိတ်ဆိုးနေတယ်တဲ့။ အဲဒီအချိန်မှာ ဦးရန်ဝေးကို ခေါ်ပြီးတော့ ငါတို့ရဲ့ ၀န်စုတွေ၊ မူးစုတွေ၊ မူးမတ်တွေဟာ မယားတွေတအား များတယ်။ အဲဒါကြောင့် သူတို့ရတဲ့လစာ နဲ့ ရိက္ခာ တွေဟာ မယားတွေနဲ့ မလောက်ဘူးဖြစ်နေတယ်။ အေး.. အဲဒါကြောင့် သူ့ရဲ့ ရာထူးအဆင့်အတန်းအလိုက် မယားအရေအတွက် သတ်မှတ်ကန့်သတ်မယ်။ လို့လဲ ပြောလိုက်ရော ၀န်ကြီး ဦးရန်ဝေးဟာ တိုင်းပြည်မှာ မယားအများဆုံးယူတာဟာ ဘုရင်ပဲဖြစ်တယ်။ ဒါကြောင့် ဘုရင်ကိုပါ ထည့်သွင်းစဉ်းစားမှအဲဒီအမိန့်ဟာ မှန်မှာဖြစ်တယ် လို့ ပြန်လျှောက်လိုက်တော့ ဘုရင် ဘာမှပြန်မပြောတော့ဘူးတဲ့ဗျာ..။ ဆိုလိုတာက ဥပဒေအထက်မှာ ဘယ်သူမှမရှိရဘူး ပေါ့ဗျာ။ မှန်တယ်ထင်ရင် ဘုရင်ကိုတောင် ပြန်ပြောရဲတဲ့ သတ္တိကို လေးစားစရာပါပဲ၊ ထားပါတော့ ကျွန်တော်ပြောချင်တဲ့ အဓိပ္ပါယ်က မင်းတုန်းမင်းပြောသွားတဲ့ ရာထူးအဆင့်အတန်းအလိုက် မိန်းမအရေအတွက် ကန့်သတ်မယ်ဆိုတာပါပဲဗျာ။ တော်သေးတယ်ဗျာ အဲဒီဥပဒေ အကောင်အထည်အပေါ်လိုက်လို့၊ အကောင်အထည် ပေါ်လို့ကတော့ အဲဒီဥပဒေကို အခုခေတ် ၀န်ထမ်းတွေ အတိအကျ လိုက်နာကြမှာပဲဗျ နော်.။ ဥပမာပြောရရင်ဗျာ.. ကျွန်တော်တို့ရုံးမှာ ဌာနကြီးမှူးတို့၊ ဌာနခွဲမှူးတို့၊ စီအီးအိုတို့ စသဖြင့်ပေ့ါဗျာ၊ ဌာနစိတ်မှူးထိရှိတယ်၊ ရာထူးတွေအများကြီးပေ့ါ၊ အဲဒီ ဥပဒေသာ ရှိခဲ့မယ်ဆိုရင် တရားဝင်မိန်းမ အများကြီးယူမဲ့သူတွေ ရှိတယ်။ ဒါတောင် သတ်မှတ်တဲ့ အရေအတွက် ပြည့်သွားလို့ တရားမ၀င် ယူကြမလားတောင် မသိဘူး။ ဒါကြောင့် ပြောရဲဆိုရဲ ရှိတဲ့ ပခန်းဝန်ကြီး ဦးရန်ဝေး ကို တော်တော်လေးကို လေးလေးစားစား ကျေးဇူးတင်မိပါတယ်ဗျာ။ ပြောသာပြောရတာပါဗျာ။ ခိုးစားတဲ့အသီးမှ ပိုချိုတဲ့ ဆိုတဲ့စကားလဲ ရှိသားပါပဲ။ ခိုးစားတဲ့ အကျင့်လေးရှိတဲ့သူကျတော့လဲ သူ့ကို ဘယ်လို ဥပဒေပဲ တားဆီးတားဆီး ခိုးစားမှာပါပဲဗျာ။ ဘယ်သူ့ကိုမှ မရည်ညွှန်းပါဘူး။ စဉ်းစားမိတာလေးကို ချရေးမိတာပါ။..

ငြိမ်သက်ခြင်း

"ငြိမ်လှချည်လား""ငြိမ်ချက်သားကောင်းလှချည်လား""ငြိမ်ချက်ကွာ. တိတ်ဆိတ်နေတာပဲ". စသဖြင့် ပေ့ါဗျာ. ကြားဖူးကြမှာပါ။ ပြောလဲ ပြောဖူးကြပါလိမ့်မယ်။ အဓိပ္ပာယ်တွေကလဲ သူ့နေရာနှင့် သူ အမျိုးမျိုးသုံးလို့ရပါတယ်။ ဘာသံမှမကြားရပဲ ငြိမ်သက်နေတာတွေ။ မေးတဲ့ မေးခွန်းတွေကို ဘာမှပြန်မဖြေပဲနဲ့ ငြိမ်သက်နေတာတွေ စသဖြင့်ပေါ့ဗျာ..။ ဥပမာဗျာ.. ကျောင်းမှာဆိုရင် ဆရာ၊ဆရာမ တွေက ပြောလိုက်တဲ့စကား/ မေးလိုက်တဲ့မေးခွန်းတွေကို နားမလည်လို့ ကျောင်းသားတွေက ဘာပြန်ပြောရမှန်းမသိလို့ငြိမ်နေတာတွေပေါ့ ။ ရုံးမှာဆိုရင်တော့ အထက်လူကြီးတွေက မေးတဲ့စကား၊ ကိစ္စတစ်ခုပဲဖြစ်ဖြစ်ပေါ့ဗျာ နားမလည်လို့ငြိမ်နေတာ၊ စပ်စုချင်လို့ ငြိမ်ပြီးနားထောင်နေတာ။ အများကြီးရှိပါတယ်။ အသေးစိတ်ပြောရရင် ကုန်မှာတောင်မဟုတ်ပါဘူး။ဒါဆိုရင် ဘာကြောင့်ငြိမ်တာလဲ ? ၊ ကျွန်တော်စဉ်းစားမိသလောက်ကတော့ .......
ဘာမှမပြောချင်လို့ငြိမ်တာလဲရှိတယ်။ စိတ်ကုန်သွားလို့ငြိမ်တာလဲရှိတယ်၊ ပြောစရာစကားမရှိလို့ငြိမ်တာလဲရှိတယ်။ မပြောချင်တော့လို့လွတ် ပေးထားလိုက်ပြီး ငြိမ်နေတာလဲရှိတယ်။ နောက်ပြီးတော့ သဘောတူလို့ငြိမ်တာလဲရှိတယ်။ သဘောတူလို့ ငြိမ်တာကတော့ ပြဿနာမရှိပါဘူး။ သူက သဘောတူနားလည်လက်ခံတာကိုးဗျ ။ အဲဒီလိုမဟုတ်ပဲနဲ့ စိတ်ကုန်လို့ငြိမ်နေတာ၊ မပြောချင်တော့လို့ ငြိမ်နေတာဆိုရင်တော့ အဲဒါ ပြဿနာပဲ။ အဲဒီလို ပြဿနာကိုဖြစ်စေတဲ့ ငြိမ်သက်ခြင်းကို သဘောတူလို့ ငြိမ်တယ်ဆိုပြီး သဘောကျ နေတဲ့လူတွေကလဲ ရှိသေးတယ်ဗျာ။ ကျွန်တော်ဆိုလိုချင်တာက ငြိမ်နေတိုင်းလဲ သဘောကျတယ် /သဘောတူတယ် လို့ မထင်ပါနဲ့။ အဖွဲ့အစည်းတွေ ၊ အများနဲ့ပူးပေါင်းပြီးတော့ ဆောင်ရွက်ရတဲ့လုပ်ငန်းတော်တော်များများတွေမှာ ဖြစ်တတ်ပါတယ်။ တစ်ချို့လူတွေဆိုရင် ကိုယ်ပြောလိုက်တဲ့စကားကို နားထောင်ချင်မှန်းမသိ၊ နားမထောင်ချင်မှန်းမသိ၊ ဟုတ်ဟုတ်မဟုတ်ဟုတ် လျှောက်ပြောနေတာ၊ အထက်လူကြီးက ငါက အကြီးပဲဆိုပြီးတော့ မှန်သည်၊ မှားသည် မခွဲခြားပဲ ပြောမိပြောရာ တွေကို ဇွတ်ပြောနေတတ်တာ တော်တော်များများ တွေ့ကြ၊ မြင်ကြ၊ ခံစားမိကြမှာပါ။ အဲဒီလိုမျိုး ခံစားနေရပြီဆိုရင် ဘယ်လိုလုပ်မလဲ ? ၊ ကိုယ့်ထက် အသက်လည်းကြီး ရာထူးလဲကြီး ပြန်ပြောလို့လဲမဖြစ်.. အင်း.. ကျွန်တော်ထင်တယ်ဗျ၊ ငြိမ်နေမိလိုက်မှာပဲ။ ဘာမှပြန်ပြောလို့ အဆင်မပြေတာ၊
ဘာလို့လဲဆိုတော့ ကိုယ့်အခြေအနေနဲ့ကိုယ်ကိုးဗျ။

သိသလောက်

ဘယ်အဖွဲ့အစည်းတွေမှာပဲဖြစ်ဖြစ် ၀န်ထမ်းဆိုတာရှိပါတယ်။ ၀န်ထမ်းတွေနဲ့ ဖွဲ့စည်းထားရတယ်။ အဲဒီဝန်ထမ်းတွေကိုတစ်နည်းအားဖြင့် ပြောရမယ်ဆိုရင် (Resource) လို့ခေါ်တဲ့ ကုမ္ပဏီရဲ့ အရင်းအမြစ်တွေပေါ့ဗျာ။ သူတို့ကိုသုံးပြီးတော့ ကုမ္ပဏီအဖွဲ့အစည်းကြီးရဲ့ လုပ်ငန်းတွေကို အကျိုးအမြတ် များများရအောင် လုပ်ဆောင်ကြမယ်ပေါ့။ ဒီနေရာမှာ အရေးကြီးတာက အဲဒီကုမ္ပဏီကို တိုးတက်အောင် အလုပ်လုပ်ဆောင်ပေးမယ့် ၀န်ထမ်းတွေကို Motivate ဖြစ်အောင်ထားရပါမယ်၊ ရိုးရိုးပြောရရင် ပျော်အောင်ထားရပါမယ်။ အဲဒါမှ သူတို့တွေ အလုပ်လုပ်တဲ့အခါမှာ ကောင်းကောင်းနဲ့ စနစ်တကျလုပ်မယ်။ အဲဒါမှာ အောင်မြင်တဲ့ အဖြေတွေ ရရှိလာမှာဖြစ်တယ် မဟုတ်လားဗျာ။ သူတို့ကို Motivate ဖြစ်အောင် လုပ်ရမယ်ပေါ့။ သူတို့ကို ဘယ်လို Motivate လုပ်မှာလဲ?
Motivate လုပ်ရာမှာ အဖွဲ့အစည်း၊ ကုမ္ပဏီအလိုက် ကွာခြားမှုတွေ ရှိပါတယ်။ အချို့ကုမ္ပဏီတွေက တစ်နှစ်တစ်ခါ ၀န်ထမ်းတွေရဲ့ လစာကို တိုးပေးတယ်။ Review (ပြန်လည်စိစစ်) လုပ်တာပေါ့ဗျာ။ တိုးသင့်ရင် တိုးရမယ်။ ပြီးတော့ သူတို့လုပ်ရတဲ့ လုပ်ငန်းတွေအပေါ်မှာ ကျွမ်းကျင်မှုတွေ ရှိလာအောင် သင်တန်းကျောင်းတွေ လွတ်သင့်ရင် လွတ်ရမယ်။ Bonus လို့ခေါ်တဲ့ အပိုဆုတွေ တော်ရင်တော်တဲ့ ၀န်ထမ်းကို တော်သလို ဆုချီးမြင့်ရမယ်။ ညစာစားပွဲ၊ ၀န်ထမ်းစုံညီပွဲ အစရှိတဲ့ Activities တွေ၊ Team building တွေကို တစ်နှစ်တစ်ကြိမ် (သို့မဟုတ်) နှစ်ကြိမ်လုပ်ပြီး ကံစမ်းမဲ ဖောက်ပေးတာ အစရှိသည်ဖြင့်ပေါ့။ ပြီးတော့ ၀န်ထမ်းရဲ့ ကျန်းမာရေးအတွက် တာဝန်ယူပေး တာတွေ။ ဒါတွေက ကျွန်တော် မှတ်မိသလောက် ဥပမာ အနည်းငယ်ကို တင်ပြခြင်းဖြစ်ပါတယ်။ အခြား ၀န်ထမ်းတွေကို Motivate ဖြစ်အောင် လုပ်တဲ့နည်းတွေ အများကြီး ကျန်ပါသေးတယ်။ ဥပမာ- အဆင့်မြင့် အင်ဂျင်နီယာဝန်ထမ်းဆိုရင် ကားပေးထားတယ်၊ ဖုန်းပေးထားတယ် အစရှိသည်ဖြင့်ပေါ့ဗျာ။ ဒါတွေကို ၀န်ထမ်းတွေရဲ့ Benefit (အကျိုးမြတ်) လို့ခေါ်တာပေါ့ဗျာ။ အကျိုးအမြတ်ရရှိမှ မည်သူမဆို ပျော်ရွှင်စွာ အလုပ်လုပ်ကြမယ် မဟုတ်လားဗျ .. ။
အောင်မြင်တဲ့ အဖွဲ့အစည်းတွေမှာ လုပ်ပိုင်ခွင့် (Authority) တွေကို ခွဲဝေပေးလေ့ရှိတယ်။ လုပ်ပိုင်ခွင့်ပေးတယ်ဆိုတာ လိုအပ်တဲ့အခါမှာ ဆုံးဖြတ်ချက် (Decision) တွေချပိုင်ခွင့် ပေးတာကို ဆိုလိုတာပါ။ အဲဒါမှ လုပ်ငန်းတွေ လုပ်ဆောင်ရာမှာ ပိုမိုမြန်ဆန်ပြီးတော့ ၀န်ထမ်း ဖက်ကလည်း မိမိကိုယ်ကိုယ် ယုံကြည်ချက် အပြည့်အ၀နဲ့ အဖွဲ့အစည်းရဲ့ တာဝန်တွေကို ထမ်းဆောင်နိုင်မှာဖြစ်တယ်။