ဒီလမ်းလေးပေါ့
ကျွန်မရဲ့ချက်မြှုပ် အိမ်ခပ်နုပ်နုပ်လေးရှိတာ။
ဒီလမ်းလေးပေါ့
လမ်းလျှောက်ပျိုးတဲ့ကျွန်မကို သူပဲကျောပိုးပေးခဲ့တာ။
ဒီလမ်းလေးပေါ့
ကျွန်မအတွက် ဒုတိယအိမ်ဖြစ်ခဲ့တာ။
ဒီလမ်းလေးပေါ့
ငယ်ဘဝနွေကျောင်းပိတ်ရက်တွေကို တစ်သက်မမေ့စေခဲ့တာ။
ဒီလမ်းလေးပေါ့
ညဥ့်နက်နေလည်း လူမပြတ်တာ။
ဒီလမ်းလေးပေါ့
မိုးရွာရင်ရေမြုပ် နွေအခါဆိုဖုန်တွေထုတ်ထုတ်ပေးခဲ့တာ။
ဒီလမ်းလေးပေါ့
ဆောင်းမနက်ခင်းတွေတိုင်း အိမ်တချို့ရှေ့မှာမီးဖိုလေးတွေနဲ့နွေးခဲ့တာ။
ဒီလမ်းလေးပေါ့
လသာညတွေကို အရသာအပြည့်ပေးခဲ့တာ။
ဒီလမ်းလေးပေါ့
ဝါတွင်းအပတ်စဉ်အရုဏ်ဦးမှာ ဘွန္တောအော်သံညံစီခဲ့တာ။
ဒီလမ်းလေးပေါ့
ညဘက်မှလွမ်းအားတဲ့ ခုံတန်းလျားတီးဝိုင်းတွေရှိတာ။
ဒီလမ်းလေးပေါ့
သန်းခေါင်သန်းလွဲ ရန်ပွဲတွေထထနွှဲကြတာ။
ဒီလမ်းလေးပေါ့
ရန်ဖြစ်လည်းပြန်ချစ်ကြတဲ့ အိမ်နီးချင်းကောင်းတွေရှိတာ။
ဒီလမ်းလေးပေါ့
အပြင်ခဏတဖြုတ်သွား တံခါးသော့အဟုတ်ခတ်စရာမလိုတာ။
ဒီလမ်းလေးပေါ့
ကလေးကလေးချင်း ထိန်းကျောင်းလာခဲ့ကြတာ။
ဒီလမ်းလေးပေါ့
သာရေးနာရေး လက်မနှေးတာ။
ဒီလမ်းပေါ်မှာ
ပျော်ရွှင်ခုန်ပေါက်ကစားဖူးသလို
အလိုမကျလို့ ဆောင့်အောင့်လည်းနင်းခဲ့ဖူးတယ်။
ဒီလမ်းပေါ်မှာ
မျက်ရည်ကျဖူးသလို
အရယ်တွေလည်း ဝေမျှခဲ့ဖူးတယ်။
ဘယ်နေရာကိုပဲသွားသွား ဒီလမ်းလေးထဲ
ပြန်ပြီးခြေချမိပြီဆိုတာနဲ့ လုံခြုံစိတ်ချသွားမိတာ အမြဲတမ်းပဲ။
ကံကောင်းချင်တော့ အခုချိန်ထိ 26နှစ်လုံးလုံး ဒီလမ်းလေးကိုခြေချခွင့်ရနေဆဲမို့
တစ်ယောက်တည်းတွေးရင်း အကျေနပ်ကြီးကျေနပ်မိနေတော့တယ်။
လဲ့သဉ္ဇာ
