စည်းကမ်း ဆိုတာနဲ့ သိကြမှာပါ။ ရုံးမှာလဲ ရုံးစည်းကမ်း၊ အိမ်မှာလဲ အိမ်စည်းကမ်း၊ ကျောင်းမှာလဲ ကျောင်းစည်းကမ်း ဆိုတာရှိပါတယ်။ ဆေးလိပ်မသောက်ရ တို့၊ ကွမ်းမစားရတို့၊ ဘာမလုပ်ရ၊ ညာမလုပ်ရတို့ အဆောင်မှာနေတဲ့ သူတွေဆိုရင် ပိုပြီးသိကြမှာပါ။ ည ဘယ်အချိန်အဆောင်ပိတ်မယ်တို့၊ ဧည့်တွေ့ချိန်က ဘယ်အချိန်တို့ စသဖြင့်ပေါ့ဗျာ၊ အခုပြောခဲ့တာတွေက ချမှတ်ထားတဲ့စည်းကမ်းတွေပေ့ါဗျာ.. ၊ လူတစ်ချို့က ချမှတ်ထားတဲ့စည်းကမ်းတွေကို ချမှတ်ထားတဲ့နေရာမှာ လိုက်နာကျပေမယ့် အခြားနေရာတွေမှာ ဥပက္ခာ ပြုတတ်ကြတယ်။ အမှိုက်မပစ်ရ ဆိုတဲ့ နေရာမှာ အမှိုက်မပစ်ကြဘူး ဒါပေမယ့် တခြားနေရာတွေမှာ ထင်သလို စွန့်ပစ်တတ်ကြတယ်။
ဒါကလဲ တစ်ဦးတစ်ယောက်မဟုတ်လေတော့ အဲဒီစွန့်ပစ်တဲ့နေရာမှာ အမှိုက်တွေကနေ အနံ့ဆိုးတွေထွက်လာတယ်။ ပတ်ဝန်းကျင်မှာရှိတဲ့လူတွေ ဒုက္ခရောက်တာပေါ့ဗျာ။ ကိုယ်နဲ့မဆိုင်ဘူးလို့တော့ မတွေးစေချင်ပါဘူး။ လူမှုရေးအသိစိတ်ဓာတ်နဲ့ပဲဖြစ်ဖြစ်၊ စည်းကမ်းလိုက်နာတဲ့ အသိလေးနဲ့ပဲဖြစ်ဖြစ် အမှိုက်ကို မဆင်မခြင် မပစ်စေချင်ပါဘူး။ နှစ်ဆန်းတစ်ရက်နေ့က ရွှေတိဂုံဘုရားမှာ ကောင်းမှုကုသိုလ် ယူတဲ့သူတွေအများကြီးပဲ။ အအေးတိုက်တဲ့သူတွေ၊ စတုဒိသာကျွေးတဲ့သူတွေလဲ အများကြီးပါပဲ။ ဘုရား ရင်ပြင်တော် တက်မဲ့ လျှောက်လမ်းတစ်လျှောက်မှာ သောက်ပြီးသား ပလပ်စတစ်ခွက်တွေ စွန့်ပစ်ထားတာလဲ တွေ့ရပါတယ်။ အမှိုက်များကို အမှိုက်တောင်းတဲ့စွန့်ပစ်ကြပါလို့ ကုသိုလ်ယူတဲ့သူတွေက အော်ပြောကြပေမဲ့လဲ မရပါဘူး။ အအေးတွေကို သောက်ချင်သလိုသောက်ပြီး သောက်ပြီးသားခွက်တွေကို စွန့်ပစ်ချင်တဲ့နေရာ စွန့်ပစ်ကြတာကတော့ ရင်ပြင်တော်လျှောက်လမ်းမှာ ညစ်ပတ်ကုန်တာပေါ့။ အမှိုက်မပစ်ရလို့ စာကပ်မထား ပါဘူး၊ ဒါပေမယ့်လဲ အမှိုက်မပစ်ရလို့ စာကပ်မထားတိုင်း အမှိုက်ပစ်ရမဲ့နေရာမဟုတ်ပါဘူး။ ကျွန်တော်တို့ ဘုန်းကြီးကျောင်းထဲ ၀င်ရင် ဘာကြောင့် ဖိနပ်ချွတ်တာပါလဲ၊ ကျောင်းထဲမှာ ဖိနပ်မစီးရလို့ စာကပ်မထားပါဘူး။ ဘာကြောင့်လဲဆိုတော့ လွယ်လွယ်ပြောရရင် ကျွန်တော်တို့ မိဘတွေငယ်ငယ်က ပြောခဲ့သလို ငရဲကြီး လိမ့်မယ်ဆိုတဲ့ စကားကို ကြောက်လို့ ဖိနပ်ချွတ်တာပါ(ကျွန်တော့်အမြင်)။ အသက်တွေ ကြီးလာတော့ ငရဲကြီးတာမကြီးတာတွေ မသိတော့ဘူး၊ ဘုန်းကြီးကျောင်းထဲဝင် ရင် ဖိနပ်ချွတ်တာ အကျင့်ဖြစ်သွားတာပေ့ါဗျာ။ ဘာလဲဆိုတော့ ကိုယ့်ရင်ထဲမှာ စည်းကမ်းလေးတစ်ခုသတ်မှတ် ပြီးသားဖြစ်သွားလို့ပါ။ အဲဒီလိုပါပဲ ကျွန်တော် တို့ အားလုံးရဲ့ ရင်ထဲမှာ စည်းကမ်းလေး ရှိခဲ့ကြရင် ဘယ်လောက်ကောင်းလိုက်မလဲလို့ နော်……
No comments:
Post a Comment